Зураг авалтынхаа тэн хагасыг агаарт авсан … шинэ “Супермэн”

2025-07-13 10:32:14

Ирэх 7-р сарын 10-нд нээлтээ хийх гэж буй “Супермэн” кинонд гол дүрийг бүтээсэн Дэвид Коренсвет тулаантай хэсгийн бэлтгэл сургуулийн ард хэрхэн гарснаа ярьжээ. 

Энэ зун кинотеатруудын дэлгэцийг итгэл найдвар бялхсан эрч хүчээр цэнэглэх Супермэний дүрээр үзэгчидтэйгээ золгож буй Дэвид Коренсвет дүрдээ таарч тохирсон бие бялдартай болох гэж хоолны нарийн дэглэм баримталж, бэлтгэл сургууль тогтмол хийснээр супер баатрын дүрээр дэлгэцнээ анхны алхмаа хийлээ. 

Ялангуяа нисэж байгаа хэсэг, агаарт тулалдаж байгаа хэсгийг илүү бодитой болгохын тулд төмөр утсаар дүүжлэгдэн гүйцэтгэдэг сургуулилтад оролцож, Супермэний дүрийн өвөрмөц хөдөлгөөнийг биеэр илэрхийлэхийг зорьжээ. 

Тэрээр “Төмөр утсанд анх удаа дүүжлэгдэж үзлээ. Маш сонирхолтой санагдсан. Тоног төхөөрөмжийн баг, зохицуулагч, орлон тоглогчдын баг цөмөөрөө итгэхийн аргагүй сайн ажилласан. Энэ хүмүүсийн ачаар олон ч зүйл сурч авлаа.” гэж зураг авалтын үеийн уур амьсгалыг эргэн дурсаж байна. 

Коренсвет зураг авалтын нийт хугацааны тэн хагасаас илүүг агаарт өнгөрүүлж биедээ бэхэлгээтэй дасгалын улмаас холгож эвэршсэн сорвитой болсон тухайгаа өгүүлж, нисэж дүүлэхэд хамаг зүрх сэтгэлээ зориулж бэлдсэнээ харуулав. 

Тулааны бэлтгэлийг ч гэсэн тухайн дүрд тохирох аргаар гүйцэтгэжээ. “Бусад супер баатрууд шиг гоё сайхан тулалдах биш Супермэний хүчит нударгыг мэдрүүлж тулалдана. Өрсөлдөгч нь Супермэн шиг хурдан байж чадахгүй шүү дээ.” гэж энгийн хэрнээ сүрлэг хэв маягийг аль болох бодитой харуулахыг зорьсноо мэдэгдэв. 

Бас “Хүчний дасгал асар их хийсэн. Өөрийгөө ингэж шахаж байсан удаагүй.” гэсэн нь кино урлагийн түүхэнд бэлгэдэл болсон дүрийг бүтээхээр хэр их хичээж чармайсныг нь илтгэж байна. 

Супер баатартай, тулаант, блокбастер “Супермэн” кинонд дэлхийн хамгийн хүчирхэг “Супермэн” дэлхийг сүйрүүлэх гэсэн дайснуудын эсрэг хэрхэн тэмцэж байгааг харуулна. “Галактикийн хамгаалагчид”-ыг гарамгай найруулж үзэгчдийн сэтгэлийг эзэмдсэн Жэймс Ганн DC студийг шинээр толгойлох болсны дараа ажиллаж буй бүтээл нь ажээ. 

Супермэний дүрд Дэвид Коренсвет, Супермэний хамтрагч, хайртай бүсгүй Лоис Лэйний дүрд Рэйчел Броснахан, Супермэний дайсан Лекс Люторын дүрд Николас Холт нар тус тус тогложээ.

“Супермэн” киног 7-р сарын 10-аас кинотеатруудад үзээрэй.