Луу хөлөглөн салхи зүсэн тэнгэрт дүүлэх Хиккап... “Лууг хэрхэн сургах вэ?”

2025-06-06 11:39:20

Викингчүүдийн амьдардаг, буйдхан Берк арал дээр нэг зовлон бий. Хонь малыг нь барьж, гэр орныг нь галдан шатаадаг нэгэн байдаг. Хиккап хүү тэр аюулаас арлаа аврах хүсэлтэй. Гэвч энэ тийм амар ажил биш. Өнөөх гайхал нь луу.

“Лууг хэрхэн сургах вэ?” кинонд Хиккап нууцлаг, домгийн луу Шүдгүйтэй хэрхэн учирсан тухай өгүүлдэг. 2010 онд нээлтээ хийсэн ижил нэрт хүүхэлдэйн киноноос сэдэвлэсэн уран сайхны кино. Хүүхэлдэйн кино бүтээдэг Дриймворкс студийн анхны уран сайхны кино болж байгаагаараа онцлог юм.

Киноны үйл явдал эх зохиолын дагуу өрнөнө. Хиккап хүчирхэг, омгийн ахлагч аав Стойк(Жералд Батлер)-ийн дэргэд үлбэгэр дорой, алалдан тэмцэлдэхэд тааруу учраас ойр тойрныхондоо нөлөө муутай. Гэтэл нэг өдөр Хиккап шархадсан, шөнийн хилэн луутай тааралддаг. Шөнийн хилэн бол гарч ирсэн даруйдаа л хүмүүсийг айдаст автуулдаг домогт луу бөгөөд, энэ лууны тухай мэдлэг хүмүүст хомс. Хиккап лууг алалгүйгээр Түүтлис буюу Шүдгүй хэмээн нэрлэж, асарч хамгаална.

Найруулагч Дин ДеБлойс “Лууг хэрхэн сургах вэ?” хүүхэлдэйн киноны цуврал 3 ангийг найруулсан туршлагатай. Тэгээд ч тэр үү агуулгаар зогсохгүй зураглал нь хүртэл эх хүүхэлдэйн кинотойгоо төстэй. Эхийг нь үзсэн хүмүүст өгүүлэмж, зохиомжийн хувьд ойр дотно. Дин ДеБлойс “Лууг хэрхэн сургах вэ?” киног найруулахдаа “Дурсамжийн ертөнцөөр аялах шиг санагдлаа. Уран сайхны кино болгохдоо хүүхэлдэйн киног нь хайрлаж хүндлэх сэтгэлээс эхэлсэн” гэж тайлбарлажээ. 

Хүүхэлдэйн киноноос илүү бодитой мэдрэмж төрүүлж байгаагаараа ялгарна. Шүдгүйг хүү сургаад хөлөглөж яваа нь хүүхэлдэйн киноны эрчтэй хөдөлгөөн дээр бодит мэдрэмж нэмэгдсэнийг даруй илтгэнэ. Хиккап, Шүдгүй нар хорлонт луутай тэмцэлдэж байгаа сүүлийн хэсэгт дэлгэцээс нүд салгахын аргагүй. Киноны баг компьютер графикийн аргаар лууг яг л хажууд байгаа мэт амилуулж хөдөлгөхийн зэрэгцээ IMAX камер ашиглаж сүрдэм, хирдхийм хэсгүүдийг бүтээжээ. 

Киноны санаа бас анхаарал татам. Лууг хөнөөлт амьтан гэж үзэж, дайсагнаж байсан бусад викингчүүдээсээ луунд өөрөөр хандаж, гар сунган тусалсан Хиккапын зан байдал өөрсдөөсөө ондоо амьтадтай хэрхэн учир зүйгээ олж амьдрах ёстойг өгүүлэх мэт. Дэлхийн өнцөг булан бүрд өнгө зүс үзэл бодол ондоо бусдыг үзэн ядах нь ихсэж буй энэ цаг үед хүүхэлдэйн киноны агуулгыг дахин сануулах энэ кино нэгийг бодуулах нь дамжиггүй.

The Black Phone кинонд дүр бүтээсэн Мэйсон Темз Хиккапын дүрд тогложээ. Мөн “Лууг хэрхэн сургах вэ?” хүүхэлдэйн кинонд омгийн ахлагч Стойкийн дууг оруулсан Жерард Батлер энэ удаа Стойкийн дүрд биеэр тоглох болсон нь үзэгчдэд хүлээлт нэгэнт үүсгэжээ.

Лууг хэрхэн сургах вэ? 6-р сарын 13-нд нээлтээ хийнэ.