Пак Со Жүнь “The Marvels” киноны ханхүү

2023-10-21 07:55:02

Жүжигчин Пак Со Жүний Холливудад хөл тавьж буй бүтээл “The Marvels” киноны дүрийн постер цацагджээ. 2023 оны 10 сарын 16-ны өдөр Марвелын албан ёсны нийгмийн сүлжээнд Пак Со Жүний “The Marvels” киноны ганцаар авхуулсан постер тавигдсан байна.

Бри Ларсон, Тейона Паррис, Сэмюэл Л.Жексон гээд гол дүрүүдийн ганцаараа авхуулсан постерын дараагаар жүжигчин Пак Со Жүний постер тавигдсан нь анхаарал татаж байна. Тэрээр намирсан урт үстэй, хүрэн бор нүдтэй, камер руу харсан байдалтайгаар авхуулсан байна.

Хувцаслалтаас авхуулаад стиль имидж нь санаанд багтамгүйгээр өөрчлөгдсөн Пак Со Жүний хувирал нь шүтэн бишрэгчдийг нь догдлуулаад байна. 

Тэрээр гол дүр Ахмад Марвел(Бри Ларсон)-ын нөхөр Ханхүү Яны дүрийг бүтээжээ. Түүнчлэн дуулж байгаа мэт ярьдаг онцлогтой хөгжмийн гарагийн ханхүү гэж яригдаж байгаа нь хүлээлт үүсгээд байна.

Холливудын кинонд тоглосон нь нууц байсан бөгөөд тус киноны танилцуулга трэйлерт Пак Со Жүнь арми удирдаж гардаг бол гол трэйлерт Бри Ларсонтой бүжиглэж гардаг нь шуугиан тариад байна.

“The Marvels” кино нь Ахмад Марвел” Кэрол Данверс, Моника Рамбо, “Хатагтай Марвел” Камала Каан гэсэн гурван эмэгтэй супер баатраас бүрдсэн баг хорон санаатантай тулалддаг тухай өгүүлэх ажээ. Олон нийтэд цацагдсан танилцуулга трэйлерт “The Marvels”-ын үндсэн агуулга, өнгөрсөн түүхийн тухай гардаг.

Пак Со Жүнь нь Ахмад Марвел, Рамбо, Хатагтай Марвел нарын очсон нэгэн гарагт амьдарч буй нэгнээр танилцуулга трэйлерт 1 секунд орчим гардаг. Түүний бүтээсэн дүрийн нэр нь “Ян” бөгөөд тэрээр урт үстэй, цэнхэр хуягт хувцастайгаар гардаг ажээ. 

“The Marvels” кино 2023 оны 11 сарын 10-ны өдөр нээлтээ хийнэ. 

Зургийн эх сурвалж: Disney