Кино театрт хүүхдүүд үзэх кино алга гэж үү? “Троллууд 2” кино нээлтээ хийнэ.
2020-08-06 17:39:06
Шинэ коронавируст халдвар(COVID 19)-ын улмаас кино театрууд урьдын адил зогсонги байдалд байгаа боловч хүүхдүүд үзэх кино алга гэж бодож байгаа бол та буруу бодож байна. 8-р сарын 7-ны өдөр “Троллууд 2” кино нээлтээ хийнэ. Тус кинонд поп, рок, классик, кантри, фанк, техно урсгал жанраас бүрдсэн троллуудын 6 тосгонд өрнөж буй сонирхолтой хөгжмийн тулааныг харуулах ажээ. Жастин Тимберлэйк хөгжмийн ерөнхий найруулагчаар ажилласан ба Келли Кларксон, Андерсон Паак, Оззи Осборн нар кантри тролл Дельта Даун, фанк тролл Принс Д, рок тролл хүнд металлын хааны дууг тус тус оруулсан байна.
Баяр хөөртэй байсан поп троллуудад аюул нүүрлэдэг. Поп троллын хатан Поппи(Анна Кендрик) болон түүний найз Бранч(Жастин Тимберлэйк) нар өөр дүр төрх, дуу хөгжимтэй троллын 5 тосгон байдаг гэдгийг мэдсэнээр шинэ ертөнцтэй танилцах болсондоо поп троллууд баярлан хөөрдөг бол рок троллуудын хатан Барб(Рэйчел Блум) бусад троллуудыг заналхийлдэг.
Барб нь троллуудын өвөг дээдсийн үүсгэсэн поп, техно, классик, кантри, фанк, рок гэсэн 6 урсгал жанруудын чавхдасыг нэгтгэн, рокоос бусдыг нь устгах аюултай төлөвлөгөө гаргадаг. Техно, классик, кантри троллуудын тосгоныг устган сүр хүчээ дуурсгаж байхад рок троллуудыг хараагүй поп троллууд өөр дуу хөгжмийг хайрладаг троллуудтай найзууд болж чадна гэж итгэн тэдэнтэй нөхөрлөхөөр аялалд гардаг.
Поппи, Бранч хоёр гол цөм нь болсон адал явдалт аялалд тэдэнд санаа зовсон Бигги(Жэймс Корден), Динклз нар нэгддэг. Өөрийнхөө хэрхэн төрсөн талаарх нууцдаа эргэлзэн шаналсан Принс Д(Андерсон Паак) мөн өөр троллуудтай уулзвал эргэлзээ тайлагдаж магад гэж найдан тосгоныг орхин ганцаар аялалд гардаг.
Уолт Дорн найруулагч нь өмнөх бүтээл “Троллууд” киног олны хүртээл болгохоос өмнө “Илүү олон дүр, ертөнцийг үзэх үзэлтэй зохиолыг бичье.” гээд “Троллууд 2”-ын зохиолыг төлөвлөсөн байна. Дэлхий дээрх хөгжмийн урсгал жанрыг троллууд амьдардаг тосгонуудтай холбож “Троллын ертөнц”-ийг шинээр бий болгожээ. Тэгээд поп троллууд бусад урсгал жанрын троллуудын тосгонд очиж шинэ дуу хөгжим, найзуудтай болж буй үйл явдлыг харуулсан “Троллууд 2”-т тролл тус бүрийн дүрийн онцлогт тохирсон олон жанрын дууг өөрчлөн дуулдаг байна. Поп троллууд “Cyndi Lauper”-ийн “Girls Just Want to Have Fun” дууг “Trolls Just Want to Have Fun” болгон өөрчлөн дуулах Квинс, рок троллууд хамтлаг болж “Scorpions” хамтлагийн “Rock You Like a Hurricane” дууг дуулж сүр хүчээ гайхуулах ажээ. Түүнээс гадна К-поп троллууд болох “Red Velvet” охидын хамтлагийн “Russian Roulette”, Реггетон троллууд ширүүн харцтай “J Balvin”-ы “Mi Gente”-г дуулдаг байна. Кантри троллуудын тосгонд очсон поп троллууд “The Spice Girls” хамтлагийн “Wannable”, PSY-ийн “Gangnam Style”, “Baha Men”-ий “Who Let the Dogs Out” дууг поп хэв маягаар дуулах ажээ. Өмнөх ангийн “Can’t Stop the Feeling!” дуугаар “Биллборд”-ыг тэргүүлж олны хайр хүндэтгэлийг хүртсэн Жастин Тимберлэйкийн SZA-тай хамт дуулсан “Троллууд 2” киноны “The Other Side” дуу өнгөрсөн 2-р сард олон нийтэд цацагдсан.
